AUZORA BUELTAN

 

   Gurea ere behinola izandako bizi-hotsa

Abenida ingurumarietako egunerokoan

Ume txit bihurria izan nintzeneko ahotsa

Paradisu faltsurik gabeko haurtzarokoan.

Non dago orduko denda, taberna edo botika

Galdezka dut atsoa aho zabalik etengabean.

Gaur kebab, jokoetxe edo klinika dermoestetika

Aizu, ama, hamarkadak ez dira pasa debaldean.

Edo aitak ezkutuan eroaten ninduen Politena,

Gure ama akademiatik noiz irtengo esperoan.

Edo arratsaldero litxarreriak erosteko Beyena,

Haurrok gozatzen genituen gutizien mordoan.

Eta orduko denda eta taberna itxiekin batera

Ezagun edo lagun zitzaizkigunon oroitzapena.

Azalez baino ez eraldatutako kale giro berbera

Auzora bueltan berriz pozik egoteko itxaropena