EUSKAL IDAZLE IKONIKOA

 

     - Bart gauean azaldu zitzaidan ametsetan Gabriel Arestiren mamua.

- Zer ba?

- Euskarazko idazle inonikoaren dekalogoa ematearren.

- Zer da euskarazko...

- Euskaraz gehien saldu eta euskaldun gehienek maitatua izateko oinarrizko edo ezinbesteko arauak.

- Zeintzuk?

- Lehenengo araua: Irakurle euskaldun gehienek derrigor maite behar dituzten istorioak idatzi.

- Barkatu?

- Bai motel, euskaldun zintzoak eta gaiztoak, bertakoen bertuteak eta kanpokoen akatsak ezin hobeto bereizten diren istorioak; esate baterako, Espainako Gerra Zibilean edo Bigarren Mundu Gerran kokatutakoak, non, gainera, zintzoak betiere euskaldun langile xeheak edo izan ohi dira, eta gaiztoak, noski, kanpotarrak edo kanpolarrosak.

-Ulertzekoa da, zuk esan bezala, denon gustuko istorioak.

- Bigarrengo araua: Hau aurrekoarekin erabat lotuta dago. Euskarazko idazle ikonikoak ez du sekula santan irakurle euskaldunik aztoratu edo atsekabetu ahal duten gaiei buruz idatziko.

- Zein...

- Euskal abertzaletasunak euskal gizartean duen hegemoniarekin lotutako inolako kritikarik edo. Zer esanik ez azken hamarkadotan pairatu dugun ditxosozko euskal gatazkari buruzko ezer!

- Ulertzen dut, bai.

- Hirugarrena: Posible baldin bada, edo agian ez, agian betebeharrekoa da, euskal idazle ikonikoak ezinbesteko euskal jatortasun maila bat izan behar du.

- Ez dut...

- Euskaldun herri txiki batekoa izan behar duela oinarrizko euskalduntasun hori egiaztatu ahal izate aldera.

- Saizarbitoria Donostikoa da...

- Saizarbitoria ez da euskal idazle ikoniko bat, Saizarbitoria literaturazale amorratuek zein literatura irakasleek bakarrik irakurtzen duten idazlerik iaioena, abilena, beharbada zailduena da, baita beteranoena ere.

- Nik uste...

- Laugarrena: euskarazko idazle ikonikoak ezin ditu ironia eta are gutxiago bitrioloa barra-barra erabili. Euskarazko idazle ikonikoaren estiloa betiere poetikoa izan behar da ezinbestez, hau da, metafora lege, aukeran mintzo melenga ere bai.

- Eta hori zergatik, zertarako?

- Zertarako? Euskarazko idazle ikonikoaren nobelatxoren batez denon gustuko pelikula bat egin dezaten, jakina!

- Barkaidazu, baina, susmoa dut euskarazko idazle ikonikoaren gaineko kontu aspergarri horrek nola edo hala Jon Sarasuak berriki bertsolaritzaren marko hegemonikoari buruz idatzitakoarekin lotuta dagoela.

- Hori niri ez galdetu!

- Nori ba?

- Arestiren mamuari berari!

- Nori, ultraeskuindar españolista horren mamuari?