NOLA DA POSIBLE?

 

    Nola da posible hau guztiau,

iraganeko triskantzetatik,

ezer ikasi ez bagenu bezala.

Nola da posible egundoko bihozgabekeria

biktimak izan ziren ondorengoen aldetik.

Euren borreroena gainditu nahi balute bezala.

Nola da posible itzelezko lotsaizun hau

egungo sarraskiak zuritzen dituztenen ahotan,

euren patua betiko madarikatu ez balute bezala

Nola da posible hainbesteko ezinikusia

gure mundua beren egiten ez dutenekiko,

gurekin orotan bat egin behar balute bezala.

Nola da posible tamainako ezaxolakeria

gure gizakideen etengabeko hilketek,

gizadiarekin zerikusirik ez balute bezala.

Nola da posible hau guztiau

mehatxua, gezurra, gorrotoa,

denon inpunitatea balute bezala.