DELAKO KANONA

Aipatzen baldin baduzu nabarmen dena, baina ez jakina gehiengoaren gustukoa, esaterako badagoela euskal literatura "kanon" abertzale bat, berehala leporatuko dizute literatura horren kontra zaudela, euskararen beraren kontra ere bai. Areago, zure irizpideak eztabaidatu beharrean zu zeu epaituko zaituzte, hau da, zuri buruzko balio epaiketa egingo dute, hots, diozuna esateko zeintzuk diren zure asmoak edo asmatu nahian. Hala ere, delako kanona egon dela, eta orandio badagoela ere, ondo asko erakutsi zigun Txillardegik berak 1985ean esandako hitzotan: «Señoritismoan erori gabe, euskal idazlea, kritikoki, ezker abertzalean kokatu behar dugu; hemen idazle batek bere herri zapalduarekin bat eginda lan egin behar du». Idazleak zein zenbait argitaletxe, hau da, kritika bai, baina beti betikoen kontra edo alde, bestela ez, bestela etsaiaren aldean kokatzen zara halabeharrez, funtsean hortaz doalako geure gauza hau, enegarren taldekeria, odolezko banderizoak gara, hau da, txuriak ala beltzak, argilunek ordea izugarri amorratzen gaituzte, gure kausa sakrosantu eta eztabaidaezinari ezer onik ez dakarkiote eta.