ZILBOR-HESTEA

 

    Zergatik ez naiz gauza

Aztoratzen,

Atsekabetzen,

Aspertzen,

ezari-ezarian akabatzen

nauen ororekin

mozteko?

Nolatan moztuko dut

eguneroko arazoekin

etorkizuneko kezkekin,

iraganeko ajeekin,

lotzen nauen zilbor-hestea?

Zertarako moztu behar

Zinez axola didaten gauzekin

Maiteen ditudan hurkoekin

Atsegin ditudan zereginekin

Bizirik nauten gorabeherekin

Katramilatzen nauen bizitza?

Noiz edo non topatuko dut

Nire ohiko egonezinaz,

Zitalaren aurreko saminaz,

Edertasunaren minaz,

Okerra zuzendu eginaz

Gobobetetzen nauen beste

zilbor-hesterik?