ETENGABEAN

Etxean bakarrik utzi nau emazteak bere gurasoekin astebetez egondako semeen bila joandakoan. Ezin lasaiago, patxadatsu, gainera, astebete luze, jendetsu, kalapitatsu, gorabeheratsu eta hainbat zentzutan etsigarri ere honen ostean, etengabe lagundua bai, baina etengabe ere zure egin beharrak esaten dizkizutenak, etengabe mota guztietako aholkuak eta ematen dizkizutenak, nork berea eta bestearenarekin zerikusirik ez duena, nor bere ikuspuntua lege bailitzan, nork bere modura joka dezazun aginduz, nork bera bezala izan zaitezen gomendatuz. Eta den-denok ez zaren vedettea bilaka zaitezen aholkatuz, den-denok egiaren jabe bailiran, den-denok auskalo zeren giltza baileukaten, den-denok betiere besteen maisu bailiran. Ah, zer plazerra, bihar arte etxean bakarrik goxo-goxo egon ahala, eta bai, faltan somatzen ditut nire mamarroak, itzel.