LOTSAGABEKOAK

Harri eta zur nabil, dexente erresumindurik. Aditu berri diet irratitik Gasteizko biltzarkideei Euskadi Eguna delakoaren kontura hika-mika, jaiegunaren zergatia edo aldatzeko elkarri mokoka, Euskadirena izan beharrean euskararena izan zedinBilduren proposamen bat eztabaidagai. Asaldatu naute, bai, beste ezer garrantzitsuagorik, premiazkoagorik ez balego bezala goiz oso batez halako huskeria legebiltzarrean lehentasun. Benetan lotsagarria bezain adierazgarria denbora alperrik galtzeko duten joera besterik ezean. Ez diot gorago aipaturiko jaieguna aldatu behar ez denik, ez, berdin dit zeharo jai hori eta beste. Alabaina, bada zerbait zinez zikina edo zatarra eta batez ere gaur egun gauden egoera sozio-ekonomiko larrian halako eztabaida hutsalez dihardutenean jendeari benetan arduratzen zaionaz jardun beharrean, badago gainera asko lotsatzekoa nire ustetan, delako jaieguna bertan behera utzi beharrean, esan nahi dut berriro lanegun aldatu beharrean, jaia kosta ahala kosta gordetzeko zuriketan ari direnean.