ARATOSTEAK

 

   Atorrak, Markitos, Kotilungorriak, Zamaltzain, Erraldoitxoa, Hartza, Mamoxarroak, Ziripit eta Miel Otxin, Joaldunak, Zakuzaharrak, Momotxorroak, Kaskaboboak eta abar eta abar. Emango luke euskaldunek euren buruak mozorratzea oso atsegin dutela, bai. Halere, beldur naiz gustokoen dituzten mozorroak oso bestelakoak diren, eta ez gorputzak mozorratzeko hain zuzen, euren buruak baizik: inor baino aurrerakoiagoak", " inor baino solidarioagoak", "inor baino esku/buruzabalagoak", "inor baino jatorragoak", "inor baino serio eta beharginagoak", "inor baino ausarta eta zintzoagoak", "benetako euskaltzaleak..."

(H)aratosteak... Urte osoan zain gogotik gaiztoa izateko irrikitan, haurrak gogotik uxatzeko, atsoak gogoagotik izutzeko, gazteak indarrez astintzeko, nire burua bera erabat iraultzeko, okela gustokoen dudala ozen-ozen aldarrikatzeko, edana nire droga bakarra dela aitortzeko, sexua gogoan dudala etengabean kanpai-jole gisa, futbola ere maite dudala esateko, besarkadak eta nire hurkoak ez direnei musuak ematea zeharo gorrotatzen dudala lau haizetara aldarrikatzeko, nik bezala pentsatzen ez dutenen arrazoibidean zaborra bereizten ez dakidala aitortzeko, fede guztietako predikatzaile guztiak gorrotatzen ditudala oihukatzeko, txiza ezin lasaiagorik zutik egiten dudala ere ozen esateko, auskalo zer beste gaur egungo pekatu latz..! Gero bai, ihauteri aroa pasa eta gero herritar otzan eta onbera izatera itzuliko naiz. Bai zera!