BIHOTZONDOKOAREN OSTEAN

Hiriko jaietako hirugarren egunaz geroztik gogait egiten hasten naiz, bai, nazkatzen ere bai. Ezin dut saihestu, ez dut nire burua festaren parte sentitzen, ikusle hutsa bilakatzen naiz eta horrek biziro aspertzen nau ikuskizuna ezagunegia begitantzen zaidalako. Areago, aurreneko eguneko alaitasun eztandaz gero, edo bestela esanda, txupinazoaren gaueko zein gehiegizko bihontzondoko hordia alde batera lagata, nahitaezko makalaldi petrala pairatu ohi dut, dena demaseko begi zorrotz edo kritikoez ikusten hasi ohi naiz, dena uste baino errepikakorragoa, zatarragoa, nekagarriagoa, ezagunegia begitantzen zait. Horrenbestez, eta ikusle hutsa bilakaturik naizenez, hau da, festan parten hartu beharrean gainerakoak zelan gozatzen duten begira egoten naizela, aspertzen naiz itzel. Egia esa, jaiok tristatzen naute oso, ez dakit joandako denboragatik eta honekin batera orduko oroitzapenak zein lagunak gogora ekartzen ditudalako ezinbestez, nire inguruan ia dena zelan zaharkitu den jabetzen naizelako edota niri hiriko jaien azpian dagoen berezko zakarkeria gero eta ageriago egiten zaidalako hainbat arlotan, hau da, urtean zehar guztiz hotza eta hitsa den hiri baten azala ziplo aldatzen denekoa, egun gutxi eta zehatz batzutan baino zoratzen ez dakiena, mozkorraren mozkorrez baino zoratzen ez dakiena, alaitasuna oihuka zein saltoka baino azaleratzen ez dakiena. Dena itxurakeria garbi-garbia begitantzen zait berez hain lehorra eta gozagea den hiri honetan. Alabaina, baldin badago itxurakeria horren adibiderik gorena hori da euskararena, zeren eta guztiz gogoeta egitekoa baita, guztiz txunditzekoa, jai egunotan ezagun dituzun mota guztietako euskaldunak, hots, ikastolakumeak, euskaldunzaharrak, euskaldunberriak, euskaraz barra-barra egiten ikustea, eta euren haur edota txakurrekin ez ezik, kalean topo egiten duten ia ororekin baizik. Ikaragarria bai, jai egunotatik aparte beraiekin kalean topo egitekotan ondo asko dakizulako aurreneko hitza berriro ere erdara hutsean izango dela aurrean dutena euskalduna dela ondo jakinda ere. Baina tira, baliteke bai euskara haur zein txakurrekin hizketan egitekoaz gain jai egun seinalatuetarakoa izatea soil-soilik, baliteke hori bere etorkizuna izatea halabeharrez, Edonola ere, helduxegiak omen gara lehen eguneko parranda zoroaz gero jai giroan soraio bermulgiltzeko, eta agian horrexegatik ere bizpahiru ordu barru Asturias alderantz ospa egiteko irrikitan nago. Jaiak ez ezik, zure hirian, zure gurasoenean, zure sorterriarekiko zerikusirik duen oro astunegia egiten hasia zaizulako. Eta hau guztiau ondo jakinda ere hemendik alde egin orduko, hau da, baliteke bihartxe bertan, herrimina nagusituko zaizula derrigorrean.