PIRAINA ARTEAN

 Noiz eta nola asmatzen duzu piraina uraska batera jausi egin zarela? Ba zure inguruko ia guztiek lagun zein ezagun dituzten gizabanako guztiak gogotik eta etengabe larrutzen ari direnean banan-banan. Baliteke gizakume guzti-guztiei betiere zerbait txarra, zatarra, zitala asmatzen dien norbait egotea? Jakina baietz, eta zoritxarrez guk uste baino maizago eta ugariago. Horretarako euren buruaz harro-harro dauden batzuk baino ez dituzu topatu behar, hau da, berenez handiustekoak; ez baitu sekula huts egiten, zure buruaz zenbat eta harroago zaude, gero eta gehiago gutxiesten duzu gainontzekoena. Halakoak ez dira inoiz gauza euren akatsetan erreparatzeko, horrexegatik gainerakoenak baizik ez dituzte ikusten, horrexegatik akatsak gainerakoengan etengabe ikusten dituzte, horrexegatik ere gainerakoak baino bikainagoak direlakoan bizi dira printzipioz. Eta jakina, piraina artean zaudela badakizu noiz edo noiz zuri ere koska egingo dizutela, gehienetan isil-gordeka, noski; ala ez, beharbada zure aurrean ere egiteko gai dira, zergatik ez, hain akasgabekoak eta harroputzak izanda. Nekagarriak, gogaikarriak dira, oso.