ESATEKORIK EZ

Fundamentuzko esatekorik ez duzunean,

zure burua barrutik hutsik somatzen duzunean,

ordenagailuko pantailan betebeharrak eta zorrak pilatzen zaizkizunean, 

gogoan zenituen egitasmoak banan-banan deseustatzen zaizkizunean, 

etorkizuna gero eta beltzagoa igartzen dizutenean, 

hatzak tekletan lardaskatzen zaizkizunean, zure inguruan dena gaizki ulertuak direnean, arima nonbait eta noizbait galdu zenuela jabetzen zarenean, 

gaurdaino okerrak eta hutsak baizik egin ez dituzulakoan zaudenean, 

orotan hutsaren hurrengoa zarela asmatu duzunean.

Hau guztiau gogora etorri bezain laster, aulkitik jaiki, belusa zabaldu eta hor kanpoan 

euria etengabe ari duela gogoan hartu,

etxean oso bero zaude eta.