viernes, 8 de noviembre de 2013

ETXEKO GARBIKETA



Hartxintxarrak, adar sein belar puskak, mota guztietako jostailu puskak, gozoki hondakinak, auskalo nongo hari matazak... astero berdin-berdin etxeko garbiketari ekiten diodanean, haurrak etxean dituzula etengabeko ezustekoetan ari zara gelarik gela garbitzen zoazela, nazkatu arte, asaldatu arte, gogaitu arte, ia negar-zotinka hasi arte bukatzen ez den sokari eutsita bazeunde bezala. Astero behin hiruzpalau orduz jo eta ke hautsak kenduz, kristalak garbituz, zorua eskobatu zein fregatuz, mota guztietako tramankuluak bildu, gorde zein ordenatuz, dena halamoduz pilatuz, hiruzpalau orduz makurtuta, kukubilko, besoak sapairantz luzatuta, tenkatuta, hainbat gauzataz blai eginda. Eta hau guztiau zertarako ote? Hiruzpalau ordu barru haurrak heldu eta den-dena berriro hankaz gora jarriko dute eta. Alabaina, hau da nire etxeko betebeharra, etxean lan egiten saiatzen naizenez astean behin garbitzeari ekiten diot nire eguneroko gauzak alde batera lagata. Etxea garbituta nago, nik ordea ez dakit neke-neke ala asper-asper eginda nagoen.

No hay comentarios:

Publicar un comentario