OTSOA

Gezurra badirudi ere, hau ezta nik propio asmaturiko ezer, hau da atzo nire seme nagusiaren izandako elkarrizketa eskolako hizkuntza ariketaren harira; badago apurtxo bat moldatua, jakina.

-Aita, ipuin bat idatzi behar dut otsoari buruz.

-Ondo ba.

-Laguntzeko esan dizut, ez dakit nondik hasi.

-Idatzi nahi duzuna, baina, arren, ez egin Otsoa eta Txanogorritxuaren enegarren bertsioa.

-Ez, otso zintzoari buruz idatzi nahi nuke.

-Zein?

-Kantuko otso zintzoa, “había una vez un lobito bueno al que maltrataban todos los corderos…”

-Ederto, zergatik ez, atsegin dut, bada garaia otsoak goraipatzeko ere.

-Hau da gaiztoa izan nahi ez zuen otsakume baten istorioa.

-Nork edo zerk behartzen zuen gaiztoa izaten?

-Bere aitak.

-Nola?

-Otsakumearen aitak ehizan egiteko agintzen zuen, bestela goseak hilko zen eta.

-Eta aita otso hori ez al zen zuzen, otsoek jateko ehizan egin behar dute eta.

-Baina nire otsakumeak ez zuen gogoko gainerako animaliak akabatzea.

-Laztana, otsoak haragijaleak dira, ezin dira barazkijaleak…

-Orduan nire otsakumea ezin da zintzoa izan?

-Haragilea baldin bada beste animalia batzuk ehizatu behar ditu jateko derrigorrez, ezin da gaiztoa izan horregatik.

-Orduan otsoak ezin dira gaiztoak izan?

-Otsoak gaiztoak izan daitezkee denok bezala, hau da, egiten dutena gaizki baldin bada.

-Eta nola egiten dute gaizki?

-Gauza gaiztoak egiten baldin badituzte premiarik gabe.

-Adierazi nahi didazu otsoak gaiztoak izan daitezkeena premiarik gabe norbait hiltzen baldin badute?

-Ehhh, bai, horixe!

-Baia otsoek ez dute inoiz premiarik gabe inor hiltzen.

-Baaaaa…. Nola ezetz, behin baino gehiagotan artalde bati eraso egin ohi diote eta jateko gai diren ardi gehiago garbitzen dute.

-Eta hori ez al da izango gizakumeek behartzen dituztelako?

-Aizu, motel, idatzi nahi baldin baduzu otso zintzoaren ipuina egizu Otsoa eta Txanogorritxoaren beste bertsio bat.

-Benetan ahal dut?

-Bai, berri horretan Txanogorritxoak otsakumea jan egingo du burruntzian ondo erretan.

-Aita, faborez, hori ergelkeria galanta da; neskatoek ez dute otsakumerik jaten…