CULTURAL MOSAIC?

Nik ez dut batere atsegin inork emakumezkoak estaltzea erlijioa edo dela kausa. Noski ezetz, ez dut gogoko inork bere borondatearen kontra ezer egitea. Nik norbanakoen libertadea ezer baino lehen lehenesten duen gizarte batean bizi nahi dut; egiazko gizarte libre baten oinarria delakoan nago. Orain bai, nola jakin goitik behera estalita doan emakumezkoa berariaz doala, inork ez inposaturik edo. Emakumezkoak berak esan lezake? Serio izan gaitezen, badakigu ezetz. Orduan, posible al da inor behartzea estaltzen duen soinekoa gainetik eranzteko? Badirudi gure legearen arabera ezetz, ezin zaiola inori halakorik eskatu ez baldin badu benetan identifikatzeko oztoporik edo. Areago, zer dela eta Chador edo Niqab (Burka oso bestelakoa da, eta ez dut uste Gasteizko autobusera igo nahi zuen andreak holako bat zeramanik, ondo asko baitakigu zer nolako nahasmendua duen jendeak halako gauzekin) bezalako soineko musulmanak gaitzetsi, debekatu, eta ez ordea mojen abitua? Alde horretatik, hots, legearen arabera, ezin argiagorik, bus gidalariak ez zuen inolako eskubiderik inor bere autobusetik eraisteko, guztiz lekuz kanpoko jokabide bat izan zen, eta zer esanik ez, are okerragoa egindakoa zuritzeko sinadura bilketa, erabat lotsagarria. Dena dela, eta hasieran esan bezala, ni soineko musulman horiek emakumezkoaren duintasun zein libertatearen kontra doazelakoan nago, ezin hobeto erakusten baitute gizonezkoekiko menpetasun erabatekoa, gauza guztiz arbuiagarria, areago gure gizartearen sexuen arteko (ustezko) berdintasunaren aldeko legediaren kontra. Hori dela eta, Frantzian oraintsu burkaren kontrako ebatzitako legeari guztiz bidezkoa deritzot balizko edo sikieran ageriko mendetasun hori gurean onartezina dela argi eta garbi aldarrikatzeko, azalez behintzat. Eta bai, ez dut oso begi onez ikusten zibilizaio ezberdinen elkartasun halakoa denak ez baitira nire ikuspegitik bateragarriak edo onargarriak; edo bestela esanda, ESBBetako melting pot delakoaren aldekoa naiz, baina ez Canadako "Cultural mosaic"en aldekoa, non hainbat erlijio eta kultura elkarrekin bizi baitira elkarren bizkarrez eta sarri askotan ere tokian tokiko lege edo arauei muzin eginez.