Benetan diot, egia esateko zin dagit, potroetaraino nago holako berriok iruzkintzeaz, asaldagarriak baino aspergarriagoak omen dira, gero eta gehiago, gainera; baina, guk denok noizik behin egingo ez bagenu batere ardura ez digula ondoriozta lezakete edo. Ba al dago ezer berririk, ezer adi/argigarriagorik, ARGIAk PPko buruzagiaren etorkizunaren kontura irizpidera dakarrenaz gain komentatzeko? Baietz ba, badakigula aita Basagoiti SANTANDERreko goi mailako zuzendaria izan zela, emazteak non egiten duen lan, badakigu ere nondik sortua/etorria dugun Antoñito zirtolari pipertsu aparta, izkimiria goi-mailako gogoeta dialektikoa bilakatu egin duena, XXI mendeko politikarako ekarri txit baliotsua, Ciceron edo Catonen pare-parekoa. Hala eta guztiz ere, hain kaikuak, inuxenteak, axolagabekoak edo alfroja huts-hutsak garela uste al dute euren lagunek politika, hau da, PPren kargua utzi eta gero, Mexikon zain duen lanpostu izugarri ondo ordaindu eta ezin hobeto erlazionatuak ez duela inolako zerikusirik Antonitoren nagusi berriak bere alderdiari eskertu beharreko ezerekin guri sinestarazteko? Baliteke baietz ba, lehen aitatutako guzti hori garelakoan daudela, edota baita guk esan, leporatu, salatu edo beraiei buruz uste izan dezakegun orok bost ardura dielako ere, erretolikak erretolika funtsean deus aldatuko ez delakoan, noski.
No hay comentarios:
Publicar un comentario