BASOAN ZEHAR

Errege opilari bazkalorduko azken hozka egin eta nire anaia eta bere bizilagunak Zaldiaran mendiera igotzeko proposatzen didate paratu den arratsalde ederraz gozatzearren. Banuen nik asmoa arratsaldean Zaldiaran alderuntz joateko, bai horixe. Asmoa bai, baina ez inondik inora familia bazkalostea mendian gora luzatzeko gogorik. Mendi edo basoan zehar ibiltzera baldin banoa bakarka izan ohi dut nire emazte eta bi semeen ezean, bakarka gogoeta egiteko asmoz, bakarka ingurumarietako txorien txio zein erreka hotsaz gozatzearren, baita mugikorreko irratiaz ere, jakina baietz. Horrenbestez, bazkaldutakoan Zaldiaran aldera jo beharrean Errosteta alderuntz joan naiz inolako tontorrik zapaltzeko asmo barik. Zonalde ederra Berroztitik ezkerretara zabaltzen den harantxoa, mendira doan kaminoan zehar bertan daude "Etxaldea" izeneko alderdia non bizpahiru baserri topa daitezkeen herritik erabat baztertuta baso erdian. Bertatik ez oso urrun ere topa ditzakegu Galbarreta herriko hondakinak. Izan ere, Gasteizko inor gutxik daki bertan "herrimortu" (arabako erdaraz "mortuorio" deritza) bat dagoela baso erdian, eremu ederra, ezin aproposagoa edozer idurikatzeko; egia esan nik neuk egin badut oraintsu idatzitako eleberri motz batean. Jakina, nik uste are inor gutxiagok dakizki inguruetako toki-izenak, euskaraz zein erdaraz, hots, Bagaza, Basagutxi, Lasaga, Pelukaran, Urzabal, Zabalgana, Cuesta Uralde, Los Tiemblos, Hoyo Grande, Hoyo Pequeño, Hayalta. Izen ederrak, zapaldu edo ikusten ditugun bazterrak ondo asko deskribatzen dizkigutenak. Gaur arratsaldean, lehen esan bezala, ez nuen inolako asmorik Errosteta mendi tontorreraino igotzeko. Zertarako? Ibilian gozatzen dut, ez besterik. Areago, banekien inola ere igoko ez nintzela. Ez horixe, negu partean basoak berak noraino joan zaitezkeen agintzen dizu. Ni geldiarazi nau tontorrerako bidearen erdiko lokatza batean. Zer esanik ez, etxeruntz bueltatu naiz segituan, beharbada balizko metaforaren beldur, sutondoko babespera, nire emazte eta bi semeak gabe mendi eta basoan izan ezik, edonon topatzen dudan bakardadera bueltan.