AZOKA

Azoka hasi da! Zein ba, banitateena? Bai noski, mota guztietakoa. Baina nik ez dittut bape atsegin azokiak, batezbe Ertarokoak emun gura dabienak, jente aldra ikaragarrixa pilaketan dalako zein bertan saltzen dabien gehixena lurra baino faltsuagoa ei dalako. Halanbe, azorara goiaz, bai horixe, azokara noia, azokatik nator, azokan dago ene gogoa...

"—Hona hemen, jauna, basoan guri barrandan omen zen

arlote bat –azaltzen dio Bizkaiko Jaunaren kanpadenda itzel

dotoreraino lepotik ia ebatuta ekarri nauten soldaduetariko

batek.

—Ez, ez da egia, ez nengoen inoren zelatan, ihesi baizik

–ez dakit zer dela eta antzekorik esan dudan, dagoeneko

komedian erabat sartuta ala agian ni ere zentzua galtzen hasi

naizelako.

—Norengandik ihesi? –galdetu egin dit bere kokoteraino

bakarrik begira ari den jauntxo ezin harroxkoagoz jantzita

dagoen gizontzar bizardunak.

Zu bezalako komediante kaskarrengandik esatekotan egon

naiz. Baina ez, badaezpada, hau guztia hasi denetik argi daukat

euren ofizioa zein seriotan hartzen duen ez dakit nortzuek edo

zein erakundek ordaindutako antzesle talde ikaragarri adoretsu

honek. Ez dut, beraz, inondik ere berriro denon aurrean

barregarri utz nazaten. Ez naute erraz jareingo, ez.

Txontxongillo gisa behin hartuta hobe dut jokua nolabait

jarraitzea, hots, ahal izango dudan modurik arinenean.

—Arrano beltza gidoin dutenengandik –arrapostu egin

dut nik ere betoskoa erakutsi nahian- badira urte pila gu denok

izorratzen ari direla etengabean. Ni behintzat potroetaraino

nengoen eta alde egitea erabaki dut hiriko harresietatik at kanpoko

haizea zer-nolakoa zen asmatu zein gozatzearren –azken

honi guztiz maltzurra izan nahi duen irrifarre bat gaineratu

diot.

—Lagunduko didazu orduan harresiok amiltzen? –nire

irrifarrea baino hamaika bider okerragoa den begiratu batez

galdetu egin dit berriz Bizkaiko Jaunak."

Azoka - Txema Arinas