Larunbat arratsalde partean T.ren gurasoenetik ihesi, inguruko mendi-zelaietan barrena, gaztainetan. Udazken berant honen kolore emea, eguzkiaren diztirapetik, argazki eder-ederrak nonnahi ateratzeko parada ezinhobeak, alderdi zoragarri baten ikusmiraz haratago. Mendi alderantz doan bide zidor aldapatsuean gora nire semeen atzetik arineketan. Bide bazterreko gaiztainen kirikio zabalduetan azterka, gaztaina kirikioaren arantza artetik erauziz, bizian bezala desiran hartu nahi duzuna kontu handiz egiten ez baduzu halabeharrez min egingo dizulakoan, gaiztaonondoaren itzalpean olgetan zuretarrekin, arestian barruan zeneraman ondoezaz azkenean arindua, zerua inoiz baino oskarbiagoa delakoan egonda, hainbeste lagun betiere gogoan, maite ere duzun lurralde honen berebiziko edertasunak txunditurik, zure herrimina ozta-ozta ahaztuta, faltan duzun guztia ia soberan, arima zein gogoa borborka, pozarren, gutxitan bezala bizirik.
No hay comentarios:
Publicar un comentario